خلى بالك

يضحك عليك ابليس ويزوق الخطية

يحط لها بهارات بتفتح الشهية

يخلى المر حلو يبرر كل نية

والنفس الجعانة تلقى ف المر غية

كلام حكيم زمان ضربوا بيه المثل

النفس الشبعانة تدوس حتى العسل

سكة ابليس جواك هى الفضا والكسل

يلا ارجع وتوب بسرعة وبعجل

ده انت ما تعرف يقصر ولا يطول الاجل

عامل نفسك ذكى تكدب تلف تدور

وبقيت بالسفسطة بين البشر مشهور

عامل نفسك كبير والكل عليك يشور

تغش حتى نفسك وكمان عايش فى الدور

ولما تتكشف زى اللبن تفور

تاكل مال الارامل وكمان مال اليتيم

تظبط الورق و تقول كله سليم

الوش ملاك يا ناس والقلب شيطان رجيم

ومفيش حد كاشفك غير الرب العليم